中環出更：貪靚金勞詹回春有術
貪靚唔係女士們嘅專利，男士們一樣可以貪靚，由服裝打扮甚至到美容，都係等閒事，但卓妮點都無諗到年過六十歲嘅立法會議員詹培忠（金勞詹）都係貪靚之人。男士西裝發揮極都有個譜，金勞詹於是向上發展，搞搞個儀容，近日好勇敢地接受PRP自體血漿生長因子皮膚回春術。容顏回復青春前要付出一啲代價，尋日見到金勞詹，佢戴住副太陽眼鏡去睇眼醫，原來佢接受治療後幾日，雙眼仲未消腫。
卓妮尋日下晝三點半路過中環皇后大道中萬年大廈門口，離遠見到戴住黑超嘅金勞詹，成個教父咁款，當時正等候座駕接載離開，期間佢又遇到一個朋友，大家傾咗幾句。過去兩日都無乜太陽，相信除咗明星之外，唔係咁多人戴黑超，卓妮問金勞詹做乜咁有型，佢就話雙眼有啲小問題，但無講有乜問題，只係話啱啱去完眼科診所檢查眼睛。
事後卓妮幾經花費唇舌，金勞詹終於開金口透露，佢前幾日接受咗一種德國新科技，就係PRP自體血漿生長因子皮膚回春術。PRP全寫為Platelet Rich Plasma，中文為高濃度血小板血漿，血液經離心及純化後，去除咗紅血球，取出高濃度嘅血小板及血液幹細胞，再重新注入臉部，可刺激母細胞更新活化，令皮膚再生，而且安全性相當高。喺香港接受治療，盛惠幾萬蚊。
戴黑超遮眼腫
金勞詹話，有朋友向佢推介呢種療程，於是一試，但效果就要遲少少先至見到。不過，未見其利先見其害，金勞詹話副作用搞到眼腫，所以要睇醫生消腫，仲要買多副太陽眼鏡遮眼腫添！所以話呢，貪靚係有代價嘅。
卓妮