瀝源邨單車位七國咁亂

房屋署職員本末倒置,合法單車泊位竟禁止市民停泊單車!有公屋居民近日如常使用邨內單車泊位,卻遭保安員以「主任唔鍾意咁多單車」為由驅趕,車主被迫搬位後發現邨內不同角落均有大量違泊單車,質疑房署職員胡亂執法,對守法者有欠公平。立法會議員認為事件或涉濫用職權及疏於執法,促房署徹查並作交代。

沙田瀝源邨所設單車泊位以全天候開放形式供居民使用,居於福海樓的黃先生早前將單車泊在樓下單車泊位,卻遭保安員阻撓,「個保安話佢哋嘅主任唔鍾意呢度咁多車,叫我泊去第二度!」黃認為於理不合而未有理會,未料數日後卻發現泊位附近突貼上「公眾地方禁止擺放單車」告示,「明明有個牌寫住係單車泊位,張通告就話禁止擺單車,咁即係點?」

黃質疑房署發出雙重通告混淆視聽,但為免惹麻煩而「行遠啲」,將單車轉泊祿泉樓地下泊位。不過,黃同時發現邨內單車違泊情況嚴重,保安員卻未有處理,「泊單車位就畀人趕,隔籬嗰座嘅欄杆泊滿晒單車又唔見啲保安去捉!」黃不滿房署職員是非不分,要求交代。

房署發言人解釋,由於當日單車停泊位已告「滿座」,保安員遂勸喻黃將單車停泊在邨內其他泊位。至於福海樓地下單車停泊位對開欄杆有單車違泊一事,職員已張貼告示,警告車主勿在欄杆停泊單車。針對該邨單車違泊情況,房署除在違泊黑點張貼告示外,更指示保安員對違泊者作出勸喻或張貼通告,要求車主把單車泊於指定位置,否則會把單車扣押及移走。由今年一月至今,瀝源邨辦事處進行了十二次清理違泊單車行動,共檢獲一百二十八部單車。

疑有人濫用職權

「嗰日個單車泊位根本仲有位,而且啲違泊單車都唔見有貼通告叫人移走!」黃先生坦言質疑房署的回應,認為有人隱瞞事實、虛應投訴。

立法會議員王國興直斥房署執法混亂,懷疑或涉有人濫用職權,「負責管理嘅(人)點可以鍾意點就點,亂咁嚟!房署應該立即調查,證明屬實就要嗰個主管檢討同改善!」

沙田區區議員衞慶祥則認為房署有剝奪市民權益之嫌,「單車泊位一定用嚟泊單車,我睇唔到咩嘢理由唔畀人泊!」衞亦要求房署對違泊單車加強執法,免令情況失控。

讀者黃先生爆料ireport_00023616

記者 林綺淇

Money18新功能「18好路數」為你預測心水股票升跌機會率