政情：胡競英拒透露去向
「亞視義工」王征嘅遠房親戚、港商黃炳均獲廣電局批准購入百分之五十二亞視股權後，亞視股東之間嘅爭拗似乎暫時平靜咗落嚟，但被停職嘅亞視行政總裁胡競英一直去向成謎。尤其是王征早前表態有意應徵亞視行政總裁之後，胡競英嘅處境更加尷尬。早前胡競英喺一個酒會現身，我哋問佢係咪仲喺亞視打工等一連串問題，佢都笑而不答，只係話呢啲問題要問王征喎！
個幾月前，廣電局批准黃炳均入股亞視，隨後王征聲稱若有需要，佢會考慮應聘行政總裁，但代表亞視另一股東蔡衍明嘅亞視董事黃寶慧即時還以顏色，話胡競英係被停職，未被解僱，行政總裁一職並冇空缺。
一直潛水嘅胡競英終於浮出水面，佢睇落好精神，又一貫爽朗健談，但一提到佢嘅工作就謹慎起嚟。我哋問佢依家職務有冇變，仲使唔使返大埔嘅亞視總部，佢都將問題推晒畀王征。佢又讚王征好有理想，亞視可以做得好好，叫大家要繼續睇亞視節目添！