政情：單雞買台股賺夠皮
有「白鴿股神」美譽嘅民主黨副主席單仲偕（單雞），一年幾前睇準台灣政局穩定，台股有望穩步上揚，於是透過買基金買台灣股票，一心諗住長揸唔放。不過尋日見到佢，佢話早兩日已經放晒啲台股啦，仲用「夠皮」嚟形容回報，睇嚟佢真係賺咗唔少。
尋日單雞同埋一班黨友同無家者世界盃香港代表隊踢友誼賽，講起最近市況，佢話呢一年多下來，啲台股大約有一成幾至兩成回報，既然成績唔錯，所以咪放手囉。
近期股市升到砰砰聲，
雞反而趁呢個時候沽貨，莫非佢有獨到見解？佢謙稱唔敢教人點做、亦唔肯定個市係咪見頂，但佢自己已經着手減磅，賺咗錢嘅股票都放番出去。識得喺牛市見好就收，唔怪得之雞經常有賺啦！
講番尋日場波，平時都有踢波嘅民主黨立法會議員無一個現身，主要係一班黨友撐場。面對訓練有素嘅無家者世界盃代表隊，梗係輸到不堪啦，結果八比三完場，叫做唔使捧蛋！