政情：高達遊墨西哥捱肚餓
立法會議員李永達喺復會前撇甩老婆陳樹英，同大學同學去咗墨西哥進行長達兩星期嘅文化古蹟之旅，實行趁開工前儲足彈藥同火力炮轟政府。
高達上月尾嘅墨西哥之旅，主要係遊覽城東面嘅特奧蒂瓦坎遺迹，入面有兩座著名金字塔：太陽金字塔同月亮金字塔。佢話墨西哥嘅金字塔同埃及嘅唔一樣，首先墨西哥所有金字塔都係平頂，外觀同其他差好遠，二嚟佢哋並唔係帝皇陵墓，只係用嚟祭祀同占卜，所以冇咁多機關，亦蘊含更大的文化意義。成個遺迹面積超過八十平方公里，唔怪得高達行足四日先行得晒啦！
除咗睇遺迹，高達仲去咗一個東南部小城、墨西哥嘅度假勝地坎昆（Cancun）抖吓，坎昆面臨加勒比海，風景秀麗，不過高達就未能夠好好享受，點解？因為當地食物唔啱食囉！高達話墨西哥最出名就係薄餅，不過佢慣咗食清淡嘢，薄餅太油膩好易滯，餐餐又冇乜菜食，結果兩個星期瘦咗三磅至返香港。