政情：搞最低工資民調 田二少自縛手腳
人稱「田二少」嘅田北辰，進身自由黨副主席一事雖暫時煞停，但佢嘅管治風格唔多唔少都左右自由黨去向。有自由黨人士形容，昔日二少係大老闆高高在上，經歷直選洗禮後老闆氣燄不見了，但就好似鐘擺咁，由一邊擺向另一邊，如今變咗選民至上，重大決策乜都以民調為依歸，田二少變咗「民調大少」，自由黨今日公布委託港大民意研究計劃進行嘅最低工資調查，聽聞就係二少主催下嘅產物。
本身經營G2000時裝連鎖店嘅田二少，半世人都係做老闆，公司業務自己一句話就說了算，擔任九鐵主席期間，其強勢領導形象就令人印象深刻。但直選令人謙卑，二少自二○○八年入自由黨做直選勇士後，一路蛻變，尤其經歷九龍西一役，更知選民力量嘅重要性，於是由大老闆一百八十度轉型至十分尊重民意。
貪平簽「喪權」條約
有自由黨人直言，二少依家就好似鐘擺咁，由一個極端擺向另一極端，乜都要話聽民意，乜都以民調先行，決策機械化。順應民意無可厚非，但「民調政治」唔係靈丹妙藥，乜都可以解決，有時反而仲令自由黨縛手縛腳，處於被動添。好似自由黨今日公布委託港大民意研究計劃進行嘅最低工資調查，據聞就一度令自由黨人不安。
有自由黨人表示，以調查結果決定自由黨對港府首個最低工資水平建議嘅立場，有其潛在政治風險，現時外界盛傳水平訂於較高水位嘅廿八蚊，一旦調查顯示有另一個數字，自由黨係咪死跟呢？廿蚊張事件已經令自由黨失分唔少，當大家將事件逐漸淡忘，自由黨跟同唔跟個民調嘅結果，都令個黨變得好被動。
自由黨大可以唔公布調查結果，當冇做過算數，但原來唔得。因為自由黨同港大民調鍾庭耀簽合約時，為咗攞個平啲嘅價錢，雙方訂明不論民調結果如何，都一定要對外公布，以保障民調機構嘅人氣，即係話將民調結果掃埋地氈底唔係一個選擇。估唔到富貴黨做民調，亦要睇餸食飯，貪平而簽下「喪權」條約，今日大家又睇吓自由黨點拆招！