吓？民主女神反民主？唔係咁離奇怪誕夾荒謬絕倫啩！
本來呢，本周惹火尤物肯定非包致金姪女Amina莫屬，事關呢位公主病患者掌摑警員居然再次逍遙法外，先係得到法官大人從輕發落，然後連覆核刑期都話維持原判，一次過辣慶全人類，男女老幼嬲到眼火爆。勢估唔到，家陣又整多個惹火尤物你歎，公民黨嘅資深大律師兼立法會議員余若薇話喎，遊行示威抗議司法不公有可能構成藐視法庭罪。
嘩！嚇鬼咩！遊行示威表達不滿啫，如果咁都算藐視法庭，莫非一向以民主女神形象示人嘅余若薇唔贊成言論自由？唔通貴為資深大律師嘅佢，都有一鋪權貴維護權貴嘅不良嗜好？
嗱，唔好怪功夫茶有個咁嘅懷疑，大家睇睇余若薇同司法機構嘅關係。當今終審法院首席法官係李國能，而李國能最早一個入室弟子係余若薇；當今律政司司長係黃仁龍，而黃仁龍係李國能最後一個入室弟子；換言之，余若薇既係李國能愛徒，亦係黃仁龍大師姐，三師徒情比金堅。講到呢度，功夫茶唔再講落去嘞，大家心領神會，費事又畀人嚇話有可能構成藐視法庭罪。
講番尋日由網民以及其他組織發起嘅連場示威吖，雖然近千示威者怒不可遏，個個認為法官姪女摑完警員逍遙法外係天理不容，不過表現一如傳統非常克制，並無過激言行，最終和平散去。如果真係好似余若薇所講有可能構成藐視法庭，睇怕香港人不但會覺得司法不公，更加會怒吼言論自由已死！
即係咁，司法機構唔去利用適當懲罰阻嚇權貴襲警，固然係超錯，若然掉轉頭利用藐視法庭罪名阻嚇示威遊行，更加係大錯特錯。你試下真係惡形惡相控告示威者藐視法庭吖，功夫茶夠膽同你寫包單，將會有更多人上街，憤怒情緒火上加油，甚至乎有可能包圍法庭抗議，而被控告嘅示威者將會成為人民英雄！
唉，好心余若薇唔好靠嚇啦，連保安局副局長黎棟國都話，香港係法治社會，容許市民表達訴求及意見，網民不滿包致金姪女襲警案判決發起遊行，相信可獲社會理解。黎棟國雖然冇講到出口，不過言下之意十分明顯，示威係唔會構成藐視法庭嘅。
法律界人士黃國桐亦話，翻查過經典法律書籍，市民參與遊行不應構成藐視法庭罪。黃國桐仲話：「如果香港司法制度連咁普通嘅批評都接受唔到，咁咪即係白色恐怖？」
咦，話時話，尋日示威行列之中只係見到自由黨，點解唔見泛民主派政黨？點解連民建聯都唔見？嗱，你唔好話除咗余若薇雙重標準之外，其他政客一樣雙重標準呀，平時係威係勢話要爭取民主自由，一旦涉及司法機構就即刻變晒縮頭烏龜。嗱嗱嗱，你更加唔好話所有政客都怕藐視法庭所以粒聲唔出呀，香港唔需要咁無知又懦弱嘅民意代表！
總而言之，寬待權貴超錯，嚴拿示威更錯，邊個顛倒是非就係與民為敵！