中環出更：肥亨減磅成功趁機換新裝

中策集團主席馬時亨減磅成功後，衣櫃內嘅舊衫幾乎全部唔啱着，由恤衫、西裝到西褲，統統要買過，早前卓妮撞見肥亨喺ifc嘅LORO PIANA興致勃勃置新恤衫，肥亨試啱就買，一口氣掃三件咁多，豪花近萬元。
肥亨係LORO PIANA常客，幫襯呢個牌子多年。（葉華英攝）
肥亨係LORO PIANA常客，幫襯呢個牌子多年。（葉華英攝）

嗰日係晏畫兩點幾，喺四季酒店食完飯嘅肥亨，順便shopping。佢目標好清晰，快步走入意大利頂級服裝品牌LORO PIANA睇衫，一嚟就揀恤衫，話咁快睇中四件，包括白恤衫、淺藍間條、深藍間條及一件深紫色間條恤衫，四件各有特色，肥亨都揸唔定主意，兩名店員打孖上照呼佢，將啲衫鋪喺玻璃枱上，等客人睇真啲。

肥亨索性走入更衣室慢慢試，着上身，效果高下立見，最後扑錘買咗三件。買到心頭好，肥亨春風滿面離開，見到卓妮顯得愕然，仍然有禮地打招呼：「乜你哋喺度嘅？」

店員（左）將四件恤衫鋪喺玻璃枱上，畀肥亨（右）慢慢揀。
  • 店員（左）將四件恤衫鋪喺玻璃枱上，畀肥亨（右）慢慢揀。
肥亨烏低身，仔細研究恤衫質料。
  • 肥亨烏低身，仔細研究恤衫質料。
豪花近萬元買恤衫，肥亨笑容滿面離開。
  • 豪花近萬元買恤衫，肥亨笑容滿面離開。

意大利恤衫滑不留手

原來佢係LORO PIANA擁躉，多年前喺意大利首次買呢個品牌嘅恤衫，感覺滑不留手，恍如第二層皮膚，一着傾心，早前買埋呢個牌子嘅褲添。買得多，已進身成為VIP。肥亨話，店員通知佢返咗新貨，所以嚟睇吓，平時買衫都係由太太代勞。三件「LORO PIANA」恤衫合共約九千幾蚊，肥亨話，價錢比喺意大利買貴啲，但難得買到靚衫，畀多少少都值得。

卓妮