政情：C18訪台 偷師學搞選戰
由立法會廠商會代表林大輝牽頭、廿幾個區議員組成嘅地區組織「C18」打響頭炮，計劃今個月二十日訪問台灣四日，美其名係同寶島嘅地區團體見吓面，但我哋收到風，C18嘅目標好高，佢哋積極聯絡緊國民黨及民進黨嘅高層人物會面，作政治交流，順便觀摩吓人哋嘅選舉係點做嘅。
C18成立未夠兩個月，喺觀塘嘅會址都未開幕，所以今次台灣之行係首次嘅實質活動，正所謂要開好個頭，大輝當然特別緊張。台灣訪問團一嚟可以表現C18團結，二嚟適逢十一月係台灣五個直轄市嘅市長選舉，依家藍、綠陣營嘅競選活動正進行得如火如荼，大輝依家去睇埋佢哋點搞選舉，啱晒時機，返到香港仲可以即刻用番喺區會選舉度，分分鐘對之後嘅立法會、選委會同特首選舉有幫助添！大輝本身來自功能界別，去台灣睇地方選舉，可謂別具意義。
下令團友做功課免失禮
千祈唔好以為大輝只係帶大家求其去睇吓人哋點叫口號就算，據我哋所知，訪問團嘅行程非常緊密，今個月二十日飛高雄，參觀市會議廳後，就即刻搭高鐵上台北，約見唔同嘅地區團體同非政府機構，仲會直接同市長選舉候選人交流意見。大輝睇中嘅全部係台灣頂級人馬，分別會見喺新北市參選嘅國民黨副主席朱立倫同民進黨主席蔡英文、台北市嘅現任市長郝龍斌同民進黨「四大天王」之一蘇貞昌、大高雄市嘅陳菊同黃昭順，但到時仲會唔會有其他神秘嘉賓，真係要等佢哋返嚟先知嘞！
聽聞大輝已下令廿五個團友都要做足功課先可以起行，起碼要了解咗台灣市長選舉嘅基本狀況，唔可以到時去到失禮人喎！訪問團旅費每人大約四、五千元，費用由團友同C18平均攤分。之前流傳過C18嘅主要財政來源嚟自大輝自己，睇得出大輝為開拓C18成員嘅眼界，真係不惜工本！返到嚟，不久就要迎戰明年舉行嘅區議會，又要為是否參與超級區會議席計計數，可以講係大把嘢做。