政情：陳岳鵬「翻牆」上facebook
內地網民一般都唔可以直接上到社交網站facebook，需要透過「翻牆」嚟突破封鎖先得。不過前日跟隨特區政府大隊到四川考察嘅特首辦特別助理Ronald陳岳鵬，即使身處內地仍然可以順利連上facebook，將佢喺四川嘅所見所聞、包括喺熊貓基地嘅體驗放上facebook供諸同好，莫非佢都識得翻牆？
其實自Ronald喺facebook刊登四川點滴後，心水清嘅網民都好奇怪，點解Ronald喺四川都可以上到facebook？尋日問過Ronald，佢話facebook上嘅資訊的確係佢放上網，但佢唔係精通翻牆術。原來身為特區政府官員嘅佢，透過特區政府嘅內聯網上網，變相翻牆，即係走官方捷徑嚟突破封鎖，內地網民就無呢個福利啦！Ronald雖然心急想畀大家知道佢喺四川做咗啲乜嘢，但話晒今次係官式訪問，總應該依內地規矩辦事；連佢都走捷徑，唔知內地有關當局點諗？