中環出更：子淇助紅十字會籌款

紅十字會尋日喺會展舉行六十周年慶祝酒會，着上Versace紅裙嘅子淇成為全場焦點，原來佢有感冒在身，偏偏老公唔得閒，惟有帶病上陣。講起囡囡，子淇就心甜，佢話湊女生活好幸福，可惜大女晞彤間學校有小朋友感染手足口病，令佢好擔心，囡囡每日放學返屋企，都會細心為佢檢查手部及口腔，幸好晞彤抵抗力強。

紅十字會宣揚捐血救人精神，卓妮問子淇捐過血未，佢笑言係「吸血鬼」，因為自幼患貧血，唔可以捐血，反而要媽媽煲豬膶水為佢補身。講到捐血，到場撐太太嘅合和主席胡應湘都話唔敢捐，佢自爆有肝炎在身，唔捐得，但捐錢絕無問題，尋日捐出一百萬銀支持新大樓落成。

蔡太（右一）捐二百萬，老公蔡志明（右二）、囡囡加怡（左一）、囝囝加讚（左二）齊齊舉腳贊成。 （伍鎮業攝）	楊鐵樑話，總部重建係該會幾代人嘅夢想。	徐子淇出錢出力支持紅十字會興建新總部大樓。

蔡李惠莉捐200萬元

玩具大王蔡志明太太蔡李惠莉亦捐出二百萬元，蔡生見太太咁熱心公益，尋日與千金加怡、公子加讚齊撐老婆。善長排住隊送支票畀紅十字會，負責新總部大樓籌款嘅胡太話感激不盡，但要籌多一億九千萬至夠錢埋單希望港人熱心捐助喎。「影業大亨」邵逸夫亦豪氣捐出一億元。

紅十字會主席楊鐵樑話，紅十字會新總部大樓重建計劃係該會幾代人嘅夢想。計劃明年底就開工，二○一四年初落成。

胡太瞓身為紅十字會，月前到訪青海賑災，為災民建臨時醫院，佢去到青海不敵高山症反應，嘔咗幾日，明日又起程去四川，卓妮都要封胡太做「紅十字女鐵人」嘞。