中環出更：余錦基為男孫捨世盃開幕
世界盃四年一度，各方愛波之人又點捨得錯過，不過足總董事余錦基今年竟然放棄世界盃開幕，咁大犧牲都係因為佢哋余家第一個寶貝乖孫將會喺本月出世，第一次做爺爺嘅基哥當然要留喺香港見證呢件大事啦，所以連世界盃開幕都過唔到南非睇，不過等乖孫出世之後，佢都應該趕得切過去睇十六強對決嘅。
改名有關做人宗旨
係人都知基哥係足球迷，不過細仔仲行第一次做老竇就一索得男，基哥當然唔走得開啦。基哥嘅新抱係全國政協鄭明明嘅千金陳維黛，所以近月都有唔少內地政協朋友打嚟恭喜佢，基哥話好多謝大家咁有心。基哥仲會負責幫乖孫改中文名，佢希望改一個有關做人宗旨意思嘅名，加上又要諗下送咩特別禮物畀粒乖孫，所以各方面都要絞盡腦汁。
忙完一排之後，基哥就會趕住飛去南非睇世界盃十六強，之後仲會去開普敦遊覽有濃厚英國特色嘅風景同靚海岸，最後就去葡萄園歎靚紅酒，難得去到，到時當然會帶番啲返嚟招呼朋友啦，仲使問！
卓妮