中環出更：葉劉搵牛津精英接替陳岳鵬
匯賢智庫主席葉劉淑儀嘅愛徒陳岳鵬（Ronald）自從辭咗南區區議員份工，過檔做特首辦特別助理後，邊個係佢嘅地區接班人一直保持神秘，葉劉亦三緘其口，不透露半點風聲，但前日呢個神秘人物終於現身。卓妮前日傍晚喺灣仔春園街巧遇葉太，身邊有個高大斯文嘅後生靚仔同行，無幾耐兩人行入合和中心對面QRE Plaza一間葡國餐廳。
原來係Ronald喺呢度為葉太舉行謝師宴，但作為徒弟嘅Ronald仲遲過師傅到場，原來佢去買咗一大紮花預備送畀師傅，唔係實畀人笑佢入咗政府就日理萬機，係影印機個機呀！葉劉見到嗰紮用嚟求婚都得嘅鮮花，冧過冧酒，叫紅酒時亦慳住徒弟個荷包，只柯打一支平價嘅「碼頭老鼠」Mateus Rose玫瑰紅酒，齊齊飲番杯。
喺facebook結緣
講咗咁耐都未介紹葉劉身邊嗰位靚仔，其實係匯賢智庫名譽財務顧問劉應東（Ellis），佢來頭不小，當年喺港大一年級讀精算，取得好成績獲獎學金到英國牛津大學攻讀金融系，仲一併完成碩士課程，回港後加入麥格理（Macquarie）資本證券股份有限公司做高層，前途無限。
至於Ellis點樣同葉劉結緣，Ellis話，年前英國畢業回港後，喺社交網站facebook與葉劉成為朋友，然後毛遂自薦入匯賢智庫做義工。雖然葉劉將Ellis收到密一密，但匯賢智庫網頁都有刊登Ellis參加活動嘅相片，據聞佢跟Ronald做地區工作已有一段時間，如無意外接手Ronald留下嘅地區工作，仲好大機會與「維園阿哥」任亮憲爭奪薄扶林選區議席添！
卓妮