政情：「一舉成名」恐秋後算帳

即場黑面嘅校長何鳳屏事後強調睇唔到吳老師舉牌嘅經過，又話唔會追究責任，但庇理羅士係一間官立中學，所有教職員都係政府官員，唔少網民喺吳老師抗議後，都擔心佢會被「河蟹」，覺得即使佢唔畀人炒魷，都難再有晉升機會。

近五十名庇理羅士校友尋日就向校長發出聯署信聲援呢位非常教師。佢哋喺信入面大讚吳老師係「教育界嘅良心」、「說話一矢中的」，「思考靈銳確當」，仲話母校素以校風自由為榮，希望吳老師繼續留喺母校執教咁話。一班校友咁難得火速營救母校老師固然值得欣賞，但同時又似乎暗示學校會秋後算帳嘅機會極高，睇怕有人睇到呢封聯署信後又會黑多一次面。