政情：米老鼠寸補選嘥時間無意義

前投資推廣署署長盧維思（米老鼠）尋日搞講座硬銷自己本中文版新書，本書主題係問責制，但有人撐咗去大西洋，催谷下月十六日嘅立法會補選，叫人去投票。問米老鼠會否響應，佢就話仲掙扎緊未決定，因為希望周日可以去游水同歎茶。不過米老鼠透露自己根本唔支持補選，因為大部分港人都支持民主普選，無必要搞個無意義嘅補選，況且中央已經否決二○一二年雙普選，做啲爭取唔到嘅嘢盞嘥氣，佢話不如攞啲新書到票站門口兜售好過喎！