政情：陳鎮仁明落馮永業面
生產力促進局行政總裁馮永業搵工跳槽，轉任機管局企業發展執行總監，人工翻幾番，不過最開心嘅應該係生產力促進局員工。事關馮永業○六年接掌生促局，引入新評核制度同花紅制，炒咗唔少工會理事，加上舊年佢捲入官司，涉嫌恐嚇身兼工會成員嘅影音助理何志永，被指以「炒魷」威脅唔畀佢參加示威活動，雖然最後官司打得甩，但同工會嘅關係陷入冰點。
上周四生促局主席陳鎮仁第一次同工會開會，馮永業都有出席，工會理事見到佢當然眼火爆，向陳鎮仁力數馮永業不是。不過，據聞陳鎮仁冇幫口解釋，仲講番自己以前做生意嘅故事，話即使當年將大部分生產線搬上大陸，都唔會執香港間廠，暗示自己有人情味；又話搞公營機構同做生意一樣，都要以人為本，唔可以乜都為賺錢，承諾以後同工會多多合作，擺明寸馮永業收買唔到人心。
陳鎮仁搵馮永業出嚟做場大龍鳳，不外乎想安撫番畀馮永業激到㷫合合嘅工會代表，希望第日可以做到上下團結一心，搞到馮永業全程面黑黑。