政情：克勤仔變動物代言人
民建聯陳克勤最近佢頻頻為動物發聲，愈做愈起勁，似乎行啱咗條路。繼年初簽署世界自然基金《為弱勢魚群發聲》聲明、戒食藍鰭吞拿魚後，克勤仔近月又為連串虐殺動物案件發聲，上月去信要求警務處處長鄧竟成正視問題，可惜鄧竟成闊佬懶理，逼到克勤要向保安局副局長黎棟國當面投訴。
克勤仔話，虐殺動物案件有增無減，最令人髮指係深水埗有人將花貓五口家掟落街慘死，但警方竟然話無時間理會呢類案件，所以逼住要向黎棟國投訴。克勤仔上星期仲喺facebook發起成立動物警察，呼籲網民舉報虐殺動物黑點，逼警方做嘢，直到尋晚為止，響應群組嘅網友已逾一萬一千人。
除咗關注虐貓，克勤仔呢幾日仲好關注立法會大樓二樓平台一個「高髻冠」雀巢，佢話雀巢有兩隻雀，一隻負責築巢，另一隻就「睇水」，連隻雀仔識「睇水」都知，莫非克勤仔學識咗鳥語？