政情：李鋈麟捐款撐再生會
身為東華三院總理嘅北京市政協委員李鋈麟（Alan），日前同弟弟李鋈發捐咗一百萬元畀再生會，幫助長期受病患折磨嘅朋友，去年底Alan仲積極推動籌組成立「再生慈善基金」，並出任基金嘅創會主席。Alan兩年前加入再生會，深感再生會經費不足，而會長又係好樸實嘅人，希望用自己做善事嘅經驗，幫助再生會發展。
Alan早前踢波不慎撞傷右腳膝頭十字韌帶，至今兩個幾月都仲未康復得晒，佢平時健步如飛，依家行十五分鐘都覺得吃力，令佢深深體會到長期病患嘅痛苦，所以佢希望借再生勇士嘅故事，鼓勵健全嘅人唔好輕言放棄，勿以吸毒逃避問題。
香港醫學會管弦樂團早前搞咗個周年慈善音樂會，為再生會籌款，醫院管理局主席胡定旭任主禮嘉賓。身為香港醫學會管弦樂團主席嘅陳以誠醫生，都同Alan一樣，希望大家欣賞再生會戰士們嘅澎湃動力，支持再生會。