政情：陳唐芷青自嘲南郭先生
女童軍今日舉行禁毒大匯演，早幾日有份演出嘅名太們齊齊返總部綵排，尋日就照足傳統到紅館切燒豬祈求演出順利，金管局總裁「攞命陳」太太陳唐芷青都有嚟拜神，當然仲唔少得有份獻唱同表演嘅女童軍總會總監邊陳之娟、籌委會主席戴胡美蓉、蔡志明太太蔡李惠莉、邱達昌太太邱吳惠平、眾人媽打李麗娟等。
攞命陳變浪漫陳
參加大合唱嘅陳太自嘲係「南郭先生」，即係濫竽充數，佢話濫竽充數呢個成語故事入邊，主角就係「南郭先生」，佢話雖然要表演，但平時無乜點練唱，只係睇老公表演得多學到嘢。不過佢希望大家以後唔好叫佢老公做「攞命陳」，最好叫「浪漫陳」；至於點浪漫，當然係唔講得啦！
講番個大匯演，會以舞台劇進行，邊太、蔡太同邱太都跟名師學過聲樂，歌聲絕對唔雞仔。同樣要solo嘅戴太，就將鄧麗君嘅《小城故事》改為《香港故事》，改咗幾句切合主題嘅歌詞。淨係做戲嘅「媽打」李麗娟同彭徐美雲就一早背好台詞，總之學大新銀行主席王守業嘅夫人話齋，女童軍個個都有效率，唔使麻煩人。