政情：邱騰華潘潔搵下屬擋箭

停車熄匙立法影響深遠，廣為市民關注，《城市論壇》今次搵咗立法會航運交通界代表劉健儀（Miriam）、運輸業界同環保組織代表上去討論，仲邀請埋邱騰華出席，諗住畀個機會佢為條例草案親自解畫。《城市論壇》嘅工作人員話，上星期四已經透過環境局新聞組邀請局長出席，不過局方前日黃昏先回覆，話只會派陳嘉信出席，並冇交代原因。

副署長陳嘉信頂硬上

環境局發言人尋日接受本報查詢時話，邱騰華一早應承咗離島區議會，今朝九點要去大嶼山昂坪主持植樹活動開幕禮，個活動要十二點半先完，所以邱局長趕唔切去《城市論壇》；至於當日點解唔派潘潔去、係咪佢另有要務，發言人都畀唔到答案。難為發言人仲話，陳嘉信先係停車熄匙呢項政策嘅負責官員，由佢代替正副局長出席比較恰當喎。

種樹到底有幾重要呢？係咪重要過解釋牽涉咁大嘅停車熄匙政策？孰輕孰重相信大家心裏有數。邱局長拎得三百幾萬年薪，冇理由連最基本嘅分內事都唔做；更何況主持植樹儀式呢類活動，花唔到幾多時間；如果邱騰華真係有心出席，又點會趕唔切去《城市論壇》呢？

一直想見邱騰華嘅自由黨主席Miriam知道佢再次龜縮唔出現，都覺得㷫㷫哋，大爆上星期四晚收到港台通知時，港台方面話邱騰華應承會到，點知最後都係叫個唔需要負政治責任嘅政務官做擋箭牌，連副局長都冇個，絕對係安排失當！Miriam忍唔住寸邱騰華話，上星期政制及內地事務局局長林瑞麟都上論壇，就政制方案親自解畫；停車熄匙立法咁大件事，局長唔到副局長都要到啦！

其實局長同副局長呢班問責高官每月人工數以十萬計，出嚟同公眾交代政策責無旁貸；如果佢哋仲係咁龜縮落去，香港民怨點會唔爆煲？