中環出更：青聯筍工畢業生爭崩頭
舊年由香港青聯主席陳仲尼（Rock）做召集人嘅「新鮮人『工』略」，尋日第二年喺柴灣廣場舉行，阿Rock希望活動可以成為青聯嘅品牌活動，為年輕人搵工謀出路。今年接手嘅副主席朱鼎健（Ken），佢因應公司觀瀾湖業務發展，提供卅個空缺，其中私人助理有成兩萬蚊人工，係全場第二高人工，難怪由朝到晚都有大學生喺佢個攤位排隊。
朱鼎健請人返嚟駁嘴
繼深圳同廣州，觀瀾湖最近落戶海南島，依家阿Ken每星期要去勻三個場巡察，四個PA都唔夠用，要搵多個幫手。阿Ken係轉數快之人，做佢PA都要夠醒目，仲要EQ高；佢話如果識駁嘴更好，證明唔係唯唯諾諾嘅yesman。
喺家族遠東發展旗下打理酒店嘅邱詠麒都提供咗十五份由七千蚊起到過萬嘅工。詠麒當年打過銀行工，求職過程艱難，所以佢絕對唔會出刁鑽題目考起班求職者。「咭片皇」鄭重科就有五份九千到萬四嘅工等緊求職者。
其他人唔到工到嘅青聯兄弟姊妹，有提供27個職位嘅信和置業執行董事黃永光、17個由八千到過萬職位嘅合和實業董事胡文新，華人置業董事劉鳴煒亦有20個9千5蚊嘅職位提供。賭王家族嘅何超蕸，就有17份八千到萬五蚊嘅信德好工。鄭志剛嘅新世界集團舊年成為最受歡迎攤位，員工忙到連洗手間都無得去，今年佢哋唔再即場面試，但提供廿幾份八千到萬五嘅工畀年輕人，一班名人二代，齊心搞好「新鮮人『工』略」。
卓妮