中環出更：鄭錦鐘拉隊歎冰鎮富貴蝦
位於中環萬邦行嘅「馬車會所」，一直深受名人愛戴，由於以會員制運作，私隱度極高，成為社交和傾生意熱點，保良局副主席鄭錦鐘（Eric）都係馬車會所常客，最愛係會所秘製嘅冰鎮富貴（瀨尿）蝦、蜜汁叉燒及鳳梨包。
咁啱早幾日Eric就約埋新任主席呂鈞堯（Quincy）及總理黃英鵬（Simy）到馬車會所開餐，傾吓保良局未來嘅工作，Eric嘅兒子、深水埗區議員鄭泳舜都有一齊去，大家集思廣益。
馬車會所秘製菜式
馬車會所呢味冰鎮富貴（瀨尿）蝦稱得上秘製，自然製作需時，無得即叫即做，Eric每次去食飯前都要預訂。瀨尿蝦要整得好食，首先要揀選靚蝦，照一照蝦嘅背部，透明蝦殼可看到有冇蝦膏，愈多蝦膏愈好。煮法係先將蝦放入熱水烚幾分鐘，然後放入冰水冷藏，約一小時後就可除殼切件上碟，呢個製法令瀨尿蝦不止食落鮮甜，肉質仲爽口彈牙。
食完瀨尿蝦再食香濃嘅蜜汁叉燒，配搭啱啱好。馬車會所嘅半肥瘦叉燒享譽盛名，政經界中人都讚不絕口，據聞佢哋用嘅係俗稱「柳脢」嘅靚豬肉，再用佢哋獨門秘方炮製；正因為叉燒太多人識整，所以秘方不能外洩。
至於鳳梨包則內有乾坤，餡料使用鮮菠蘿果粒，配合包面嘅脆皮，食落好香口。Eric食飯習慣帶備兩類酒，分別為葡萄酒及貴腐甜酒，當日就帶咗一支○五年嘅Chateau Margaux（瑪高酒莊）白酒及○二年Chateau d’Yquem（滴金酒莊）貴腐甜酒，配合進食主餐和甜品飲用。
講開保良局工作，Quincy、Eric同Simy愈做愈起勁，希望喺社會公益有所作為，希望洗脫總理只懂捐款「遞支票」嘅印象，其實保良局做咗好多工作，好似提供社區飯堂援助綜援人士就係最佳例子。
卓妮