卓妮早前揸車經過中環歌賦街「九記」歎香噴噴牛腩，探頭一望，原來Eason比卓妮更早一步埋位，佢同司機結伴而來，當時係下午三點半，係時候食下午茶，Eason點咗碗招牌牛腩麵後即時除低口罩，埋頭埋腦食麵，食客見到大明星同枱食麵，食時O晒嘴，有食客主動同Eason打招呼，佢亦禮貌地報上微笑。Eason用十分鐘清晒碗麵，之後仲當眾撩牙，埋單時Eason主動「科水」請司機食麵，又轉身同舖頭食客講拜拜，全無明星架子。

甘威食足廿年未厭

講開又講，甘威都係「九記」擁躉，佢自爆從小就幫襯「九記」，食足廿年仍未厭，每次想去中環搵地方醫肚，都會揀「九記」。甘威最鍾意食「牛腩伊麵」，佢話伊麵「索」晒牛腩汁，配搭一絕，可惜日漸發福，為免食得伊麵多太油膩，近年已改食牛腩麵嘞。