商戶罷市，最大損失就係佢哋自己，如果唔係無路可行，絕對冇人會出此下策。好似開藥房嘅羅生咁，喺樂富中心商場做咗廿幾年，今年租金加咗倍半，每月連埋冷氣費、管理費要成八萬幾，賺埋都未夠交租。

租金一加就係倍半，咁加法，同住搶已經冇乜分別。唔怪得連見多識廣嘅立法會議員都話，未見過業主無良加租，狼到好似領匯咁。

全港公屋商戶總會話，原本打算下禮拜發起全日罷市，考慮到對市民影響好大，決定暫時押後，遲啲會發起全港簽名運動、遲交租金、絕食靜坐抗議等進一步行動。話時話，屋邨商戶齊齊罷市，確係大件事，尤其係西醫診所，罷診令市民有病睇唔到醫生，隨時影響病情，可大可小，所以其他商戶罷市仲情有可原，但醫生罷診就值得商榷咯。無論點都好，首先要顧及公眾利益，否則就好難得到市民認同及支持。

其實，呢次三千幾商戶罷市三粒鐘，不過係象徵式表達不滿，下次如果行動升級，全港屋邨商戶齊齊罷市，港府點應付先？

冰凍三尺，非一日之寒，商戶不滿領匯嘅經營手法，唔係一兩日嘅事啦。近年來，領匯罔顧居民利益，瘋狂加租，已經不斷有關注團體同商戶組織上街抗議，連一向低調嘅屋邨西醫團體亦罕有咁加入罷市行動，證明市民對領匯殺雞取卵嘅經營手法極度反感，忍無可忍。

領匯唯利是圖，懶理市民利益，搞到天怒人怨，社會不得安寧，當局冇理由唔知㗎。其實搞成今日咁，始作俑者正正係港府自己。當局為卸包袱，將大部分屋邨商場及停車場交畀領匯管理，同時將領匯上市，自此之後，公屋商場便不斷加租，幅度閒閒地加成倍甚至幾倍，交唔起貴租嘅小商戶被趕盡殺絕，領匯嘅做法，與屋邨商場為低下階層市民提供廉價貨品同服務嘅宗旨根本係背道而馳。

呢幾年，涉及領匯經營手法嘅爭議從未停過，除咗瘋狂加租之外，仲有擅自更改員工僱傭條件引發工業行動、將屋邨酒樓舖位改租畀老人院，甚至連醫生診所或者幾個屋邨內唯一嘅銀行，都淪為佢哋迫遷對象。但最奇怪嘅係，港府竟然好似局外人咁，完全無動於衷。

領匯上市嗰陣，港府實牙實齒承諾，公屋居民生活將唔受影響。但多年嚟，當局睇住領匯魚肉公屋居民，當小商戶好似羊牯咁劏，除咗用「唔干預商業決定」做理由卸膊，幾時出過半句聲？幾時有為小市民主持公道？講到尾，如果冇港府縱容，領匯根本冇可能為所欲為。