樓價向上衝完一輪，現時又有回落迹象，樓價上上落落，令有意置業嘅人士無所適從。咁啱我哋尋日遇到「以心建家」嘅新鴻基地產副主席郭炳江（Thomas）去香港會食晏，就梗係要問吓佢點睇樓價啦！點知Thomas回應話：「嗱！呢樣嘢（樓價）我會講嘅，十二月公布（業績），到時就會詳細講喇！」尋日啱啱出咗經濟數據，唔通Thomas仲未計掂條數？
講番Thomas出巡嘅排場，同以往一樣如臨大敵，除咗坐住價值七百萬元嘅寶馬760LIA High Security防彈豪華座駕外，仲有保鏢貼身保護，我哋欲行埋去Thomas身邊打個招呼時，即時被保鏢好似打籃球咁「嘜」到實一實。Thomas見我得一個人，先至着保鏢讓開，回應咗上述問題外，又話如果唔係約咗朋友食飯，平時都好少去香港會，事關佢知道呢度經常有記者喎。