覓得第二春嘅立法會議員涂謹申，人逢喜事精神爽，笑容滿臉，尋日出席內務委員會前嘅午飯時間，貢咗去灣仔電腦城行街，結果畀個印有心形圖案嘅電腦產品公仔吸引住。其實個公仔係個4G容量嘅ＵＳＢ記憶棒，屬韓國Samsung超人氣產品，每個只售一百二十元，阿涂畀個店員講多兩講，就忍唔住買咗個，可能用嚟氹未婚妻開心都未定。
呢個公仔ＵＳＢ睇落都幾Cute，佢個名仲Cute，叫「Naive」，即係前國家領導人名句「Sometimes Naive」個Naive，天真又幼稚。咁啱阿涂喺立法會門口遇到黨友李華明，於是笑笑口指住肥仔明話：「呢，好似佢咁，Sometimes Naive！」肥仔明聽到都唔知好嬲定好笑，於是還以顏色話：「4G容量夠晒佢存放結婚相啦！」唔知點解，阿涂話唔好成日講佢結婚喎！