民政署LO嘅工作好廣泛，好似協助成立業主立案法團、協調政府部門同諮詢居民咁，佢哋一直投訴工作量太多，但政府拒絕加人手，所以玩半罷工。其實LO協會搞對抗已唔係第一次，好似今年五月，即係豬流感（H1N1甲型流感）爆發期間，協會因不滿署方無提供足夠防護裝備同培訓，呼籲員工唔好去疫區或者隔離營工作。陳甘美華面對LO協會步步進逼，一籌莫展，點知又殺出班EO加入戰團。

尋日我哋收到一封署名「一群不滿的行政主任」嘅投訴信，信件抬頭係寫畀煲呔曾同公務員事務局局長俞宗怡。信中投訴，LO同僚搞工業行動，嚴重影響地區行政工作，無形中將部分工作推晒畀EO等其他職系，令EO無止境咁硬啃額外工作，就嚟谷到爆。本來呢啲政府不同職系之間嘅紛爭，可謂公說公有理，外人一般興趣唔大，不過呢封投訴信最辣之處，係筆鋒一轉，將矛頭直指陳甘美華。

投訴陳太軟弱 擇善而欺

呢班「EO」投訴陳太「昏庸軟弱」、「擇善而欺」，多年來縱容LO，減其工作量，變相欺壓EO，終令LO協會得寸進尺，搞出今次工業行動。封投訴信洋洋灑灑二千字，睇嚟投訴人都谷咗好耐，民政署內部矛盾極深，所謂冰封三尺，非一日之寒，陳甘美華如果話事前全不知情，咁都幾大意喎，但如果知道，點解LO同EO之間嘅紛爭咁多年嚟有增無減呢？

陳甘美華由○三年開始執掌民政事務總署，之前做過三年勞工處處長，勞工界對佢評價唔錯，指佢無架子、夠和善，今次LO採取工業行動，EO投訴不滿工作量大增，某程度係由勞工福利問題觸發，陳太騰雞都無用，不如攞番勞工處嘅經驗出嚟，同班下屬好好傾吓啦。

民政事務總署發言人話，署方一直平等看待不同職系，LO採取工業行動後，署方已採取適當措施，減低EO額外工作量，好似容許請行政助理咁。署方有意呵番EO同僚，話多謝EO職系喺工業行動期間緊守崗位。