任總離開金管局後，大家一見到佢少不免追問吓最新動向。佢話自己尚有半年「冷河期」，如果依家出山打工，就要得到財爺首肯批准，所以佢笑笑口話：「為免大家難做，好多嘢我都打算唔做住。」前商務及經濟發展局局長馬時亨重投商界，唔知任總會唔會步其後塵下海去呢？任總一聽完，即時斬釘截鐵封咗自己後路話：「商界我就唔係好大興趣，講到尾會有一啲畀人覺得利益衝突……全職加入商界一定唔會！」

科大「笑」陳祖澤矮仔

另一獲頒榮譽博士嘅阿John出名玩得兼有幽默感，點知尋日科大嘅讚辭卻更加幽默。讚辭一開首話，美國總統奧巴馬當選，證明膚色與領導能力無關；香港陳祖澤則證明，身形高矮與領導能力無關，阿John聽完呢篇別出心裁嘅讚辭都忍唔住會心微笑。阿John話，佢由科大創校就已經係校董會成員，淵源甚深，所以今次獲科大頒授榮譽博士感到特別開心。

尋日係黑色星期五，咁新任校長陳繁昌擇呢日就職會唔會唔吉利㗎？陳校長笑言自己係科學家，所以唔迷信，佢仲承襲前任校長朱經武「以學生為本」嘅作風，上任第一個星期已經與學生會代表會面，仲計劃每個月同學生聚餐一次，務求令師生打成一片。

卓妮