部門處事粗疏，分分鐘危及市民性命！石塘咀居民吳女士指出，皇后大道西近日富里一段行人路上，已鋪設的修路膠板呈凹凸不平，每次途經均一步一驚心，「我已經好小心咁行，但有幾次都差啲仆親，早幾日先見到阿婆喺嗰度仆倒，啲膠板分明就係陰人！」吳促當局盡早改善，免令市民受傷。
中西區區議員陳財喜承認曾接獲居民反映上述問題，直斥部門失職，以市民生命「較飛」，「嗰度附近有老人中心，成日有好多老人家行，真係要快啲整番好至得！」
路政署發言人解釋，水務署正於上址進行水管重鋪工程，接獲轉介後，水務署已督促承建商改善不平的臨時膠板，保障途人安全。
