唔講唔知，原來全港最冇環保意識嘅居然就係政府部門，佢哋成日賊喊捉賊，得把口叫人節約能源，自己就帶頭嘥電，試問空氣又點會改善到吖！

本報記者去過全港多區政府建築物睇過，發現多數仲係用緊光管，當中好多而且係Ｔ８普通光管，而唔係比較光、比較慳電嘅Ｔ５節能光管！以灣仔律敦治醫院為例，唔理係主樓、病房、急症室定係樓梯，全部用緊普通光管，有啲仲係二十四小時長開添，小數怕長計，一年都唔知嘥咗幾多電呀！其實，改用節能光管比普通光管慳電三成，點解當局死都唔肯換呢？

環保署發言人仲唔知衰，死撐新落成嘅建築物以及現有建築物進行翻新、裝修而裝置照明系統時，會先考慮採用具有節能效能嘅照明設備，如果要添置新燈具或替換現有燈具，部門會考慮場地需要及技術因素下盡量採用節能照明。唔使講，又係吹水啦！

本報記者睇過，政府建築物嘅照明系統認真亂七八糟，即使係同一個政府部門管轄嘅建築物，居然亦有唔同嘅照明系統。

舉個例，食環署管轄嘅鵝頸橋街市已經轉晒用節能光管，但保安道街市仍然用緊普通光管，一署兩制，你話係咪混帳呀！

唉，政府官僚搞環保不嬲都係大隻講。審計署報告曾經狠批過新廉政公署大廈，話就話係環保設計，點知電力開支遠超預算，比估計超出咗一點一倍。此外，機電工程署總部仲搞笑，懶咁巴閉話利用太陽能等再生能源，點知落成後耗電量唔單止冇減到，反而仲多咗，真係笑爆嘴。

仲有一個更瘀皮嘅例子，就係早前環境局局長邱騰華為慳電膽現金券計劃護航，一邊力撐慳電膽，一邊狂踩更環保嘅發光二極管（LED）燈膽未有國際測試標準。好衰唔衰，新政府總部發展計劃嘅文件自己踢爆，慳電膽和鎢絲燈效能較低，新政府總部將會使用LED燈具。呢，咁咪就係講一套做一套囉。

話時話，政府近年成日敲鑼打鼓推動環保節能，好應該帶頭環保起示範作用，既可減輕電費支出，又可以建立環保形象，可謂除笨有精啦。

可惜吖，成班高官只係識得假環保真做騷，要佢哋的起心肝帶頭環保，相信仲有排等。計功夫茶話齋，不如索性更換晒班高官，相信仲快過佢哋更換節能光管。