多做運動身體好，不過如果凡事都諗住無師自通，就好容易弄巧反拙嘞！立法會議員黃國健（KK）尋日出席國際詠春聯會搞嘅千人詠春匯演時自爆，之前曾經試過自學氣功之一嘅八段錦，本來諗住強身健體，順便鍛煉意志，點知最後就傷咗筋骨都唔知，痛咗一段時間，話以後都唔敢再亂嚟喎！
本身無武術底子嘅KK，見年紀開始大，上年諗住學番門手藝養身，但又苦無上堂時間。咁啱佢見屋企有隻教八段錦嘅光碟，就諗住得閒喺屋企自己練吓，伸展手腳同調理氣息。點知練咗幾次，就開始覺得唔對路，手腳嘅關節位同腰都有啲「冤痛」，KK拿拿臨去睇醫生，醫生就話佢可能耍八段錦嘅姿勢唔正確，所以傷到筋骨，叫佢唔好再練喎！經此一役，KK話立即將隻光碟掃落床下底，掂都唔掂佢，但就話會重整自己嘅生活作息，的起心肝搵番個師傅學番「一招半式」。
尋日去睇詠春匯演嘅仲有民政事務局副局長許曉暉（Florence），早前同佢同枱食飯嘅立法會議員李永達（高達）叫錯佢個名，Florence就話純屬誤會，仲話兩個人其實都幾熟添！Florence解釋，高達有幾個朋友都係叫「許×暉」，所以平時都係用英文名稱呼喎！