政府成日都賣廣告叫市民終身學習，一班特區高官梗係唔例外，要不時自我增值。尋日商務及經濟發展局局長劉吳惠蘭（Rita）返母校何明華會督銀禧中學同班師弟妹見面，講吓自己喺政府入面嘅工作時，就提到最近開始「趕潮流」，學用時興嘅交友網站facebook。
Rita話最近政府開始討論，點樣好好利用依家流行嘅互聯網工具收集民意同宣傳政策，所以佢都開始學吓用facebook同Twitter。但係學習嘅過程都唔容易，Rita完全畀呢兩個現今最大型嘅交友平台考起，自嘲自己只係學到BB班程度，要善用facebook仲有排學喎！其實facebook同Twitter本身係用嚟識朋友，或者同其他人聯絡感情，各高官與其用佢嚟收集民意，不如聽吓天主教香港教區主教湯漢話，多啲同持唔同意見嘅人做朋友啦！
講開同人做朋友，Rita仲提醒一班師弟師妹，善用互聯網之餘仲要識得好好保護自己，如果第一次同網友見面，去吓咖啡店飲吓嘢就好，千祈唔好上人哋屋企，免得行差踏錯喎！