立法會足球隊尋日約咗旅遊界代表鬥波，立法會旅遊界代表謝偉俊（Paul）攞正牌做牆頭草，上半場係立法會隊員，下半場就掉轉槍頭為旅遊界出力，最後立法會隊以五比二勝出，旅遊界隊兵敗如山倒，唔知同呢位球壇新進「Laughing哥」有冇關係？
尋日見證今屆立法會足球隊延續不敗傳奇嘅主禮嘉賓，有阿Paul嘅宿敵旅遊業議會總幹事董耀中。上年立法會選舉，董耀中掛住自由黨招牌參選，畀阿Paul連番狙擊，指旅遊業議會同業界有利益衝突，二人勢成水火，點知尋日冤家路窄，當兩隊交換錦旗時，佢哋好識大體，握手泯恩仇。立法會足球隊隊長林大輝即刻講笑話：「證明足球幾咁偉大，呢吓就叫世紀握手嘞！」
立法會上半場本來先輸一球，旅遊界一時士氣大振，可惜半場未到，畀立法會隊連追三球，兵敗如山倒，以二比五大敗，不過，立法會亦有啲勝之不武，全部入球都係出自外援之腳。立法會內務委員會主席劉健儀（Miriam）頒獎，徇眾要求向球員獻吻，一向不修邊幅嘅長毛梁國雄姍姍來遲，Miriam見長毛嚟緊，即刻話：「獻吻程序已經過咗嘞。」Miriam點解咁驚錫長毛呢？