CY尋日接受前高官馬時亨主持嘅電台節目訪問，原本只係大談青少年前途問題，點知忽然畀肥亨嘅拍檔主持殺個措手不及，問佢將來選特首輸咗，會否有挫敗感同前途迷惘？CY除咗話坦言面對輸贏外，又指自己做咗公職幾十年，並非為自己個人榮辱，更加唔係為咗光宗耀祖，總之盡力去做，無愧於心就得嘞。

談到時下年輕人憂慮前途問題，CY自稱七十年代初出茅廬時，都感到前路茫茫。正所謂「人無遠慮必有近憂」，當年大家最憂慮係九七年前途問題，好多人搞移民，想讀醫科嘅人唔敢讀醫科，擔心大陸啲赤腳醫生回歸後在港執業，香港醫生無得撈，讀法律就更加唔使講，事關當時話回歸後會「無法無天」嘛！

畀「糯米滋人字拖」激親

相對今日嘅香港，雖然上位機會少咗，但CY話內地同東南亞地區嘅發展潛力好大，年輕人仍有大把作為。不過，CY話做事都係其次，最重要就係學做人，而最近發生喺佢身上嘅「糯米滋及人字拖」事件更令他怒不可遏。CY話有次到某間大學演講通識及環保，見台下有學生着短褲、踢人字拖，講座開始時，仲見有個女同學攞盒糯米糍出嚟，一粒一粒放入口慢慢食，中途又不斷公然講電話。

CY強調，任何人都要尊重自己同尊重別人，學生並非只學書本上嘅知識，仲要學做人，如果態度唔好，輕則做事不成功，重則變成好叻嘅壞人。肥亨就呼籲年輕人要擴闊視野，事關佢早幾日到港大演講環球轉變與挑戰，出席學生唔夠一半，佢強調，學生除咗讀書同學做人外，最重要係學懂獨立思考、溝通能力和擴闊視野，有咗呢三個條件自然無往而不利。