本文重點
百行以孝為先。傳聞話有位飲食界翹楚好孝順，每朝都會陪阿媽去飲早茶，風雨不改，卓妮四出打聽後，發現呢位孝順仔原來係鏞記酒家老闆甘健成。為查證呢個傳聞係咪屬實，卓妮尋朝去咗禮頓道鳳城酒家一趟，果然發現甘老闆蹤影，見佢喺酒家門口報攤買咗份《東方日報》，然後上酒樓同阿媽和老婆會合，歎番一盅兩件。
甘老闆坐低無耐，隨即恭敬斟茶畀阿媽，又拿起點心紙點咗阿媽最鍾意嘅燒賣同西洋菜雲吞，點心到齊後，又親自夾畀阿媽享用，關懷備至。年屆八十歲嘅甘媽媽非常壯健，每朝慣咗飲早茶，但飲茶地點就會「打游擊」，有時甚至去檀島咖啡餅店歎杯奶茶同菠蘿油都未定，所以甘老闆每朝會等候甘媽媽通知，然後趕去會合，風雨不改。
11歲閉關自創菜式
甘老闆咁孝順，難怪甘媽媽話：「呢個仔算係咁喇！」甘媽媽知個仔由朝到晚工作咁辛苦，都會藉飲茶為甘老闆打打氣。甘媽媽憶述，甘老闆自小就好鍾意煮嘢食，十一、十二歲嗰陣試過趕工人出廚房，話要自己閉關創作一味好餸，搞咗一大輪，最後煮咗味「炆斑尾」出嚟，食落都算唔錯，為日後創作新菜式打下強心針。
不過，最令甘老闆記憶猶新嘅，反而係小時候學整「炸蝦片」，記得有一個程序係要先將未炸嘅蝦片風乾，然後才落鑊油炸，可惜蝦片放喺「騎樓」風乾時，大部分畀流浪貓偷食晒，六十多塊蝦片剩番三幾塊，但好彩最終都炸得好成功，至於邊個有幸一嘗呢塊咁矜貴嘅炸蝦片，甘老闆就無交代喇！
卓妮