見到霍公子梗係問吓即將來港參加東亞運動會跳水比賽嘅跳水公主郭晶晶同囝囝啟剛有無喜訊要公布？佢笑住話：「今次佢（郭晶晶）嚟係代表比賽，（有無同你飲吓茶？）佢係體育界身份，要有紀律。」不過，小霍不忘推銷香港，叫國家運動健兒來港要多啲Shopping。「佢哋個個都鍾意香港，希望佢哋今次嚟唔好淨係為比賽，香港咁好，多啲Shopping啦」。

上周一晏晝兩點半，小霍一支公現身中環皇后大道中嘅Rimowa，戴住黑超喺度睇篋，見佢對一款三十一吋大、用聚碳酸酯（Polycarbonate）製成嘅銀色旅行篋特別感興趣，邊睇邊伸手敲吓篋身外殼，睇吓個篋實唔實淨。

帶去睇倫敦奧運？

Rimowa屬過百年歷史德國品牌，啲篋出名硬淨，小霍睇中嗰款就賣五千八蚊。不過當佢發現卓妮後就打消掃貨念頭，推門走人。卓妮上前問佢買定篋去邊，小霍笑騎騎話：「睇吓啫，未決定買唔買。」

原來佢想買一個輕啲嘅旅行篋，查實小霍出差所住嘅酒店例必有專人服侍攞行李，又何需為行李重量操心呢？小霍解釋話，倫敦嗰邊啲人（酒店侍應）嫌佢個篋太重，為他人着想，寧願花少少錢換篋。咪住先！倫敦嚟緊有乜盛事要小霍出差先？二○一二年倫敦奧運舉行在即，唔通小霍依家就揀定個「奧運專用旅行篋」!?

卓妮