唔係危言聳聽㗎，○五年本港就有兩名行山人士因為手機失去聯絡先後出事。其中一位蕩失路報警，點知因為電話訊號收唔清失去聯絡，至今生死未卜。隔咗冇幾耐，又有另一個跟大隊行山嘅青年途中失蹤，行山導師立即打佢手機，竟然接咗去內地漫遊網絡，隔咗兩日至搵到屍體。

查實行山徑到處都係盲點，電訊管理局又點會唔知吖。佢哋○六年三月開始，打鑼打鼓話加強手機流動網絡覆蓋情況，調查全港最熱門遠足徑手機接收質素，結果搵到好多盲點。電訊管理局當時已表明會游說網絡供應商喺盲點加建流動電話發射站，改善手機接收問題。

事隔三年，依家嘅情況有冇改善呢？本報記者特登去過屬於四星級高難度嘅粉嶺八仙嶺行山徑，行行吓手機不但顯示「無服務」，就算係打九九九以及國際救援電話一一二都駁唔通。

唔係功夫茶嚇你，香港有好多屬於四星級難行路段嘅行山徑，其中大嶼山石壁水塘至大澳全長十七公里嘅行山徑，當中竟然有七段盲點，一共長達四公里，行山人士如果有乜冬瓜豆腐，肯定九死一生都得咯，真係三思而後行山呀！

有遠足專家表示，曾經要求手機網絡商喺手機盲點區增加發射站，但對方話冇商業價值而拒絕。商業機構在商言商冇得好講，但政府責無旁貸，好應該諗吓點樣改善盲點問題至得㗎。

點知電訊管理局仲死剩把口，話現時全港郊野公園約有九成半嘅熱門遠足徑，已經有至少一個本地流動網絡覆蓋，行山人士喺冇網絡覆蓋嘅地方遇到意外，可以使用無線電對講機求助，又或者用漫遊服務求助喎。咁即係話，如果行山人士真係咁唔好彩去到剩番嗰半成盲點區，只好各安天命喇。

香港得豆腐膶咁大，又唔係乜嘢山旮旯地方，以今日嘅通訊科技咁發達，通訊網絡百分百覆蓋根本唔係難事。聽講海拔八千幾米高嘅珠穆朗瑪峰，登山者一樣可以打手機，咁因乜事自詡國際都市嘅香港，竟然仲有咁多地方收唔到手機訊號呢？

講到底，咪又係當局懶得就懶，你死你事。喂，人命關天，十月份開始又係遠足旺季，杜絕盲點區係刻不容緩嘅事情。即使網絡供應商唔肯喺盲點區域增加多啲發射站，政府咪自己做囉，斷估唔使好多錢啫，再唔係，炒晒班廢柴副局長及政治助理，每年慳番嗰幾千萬應該夠有凸啦！