本文重點
自由黨喺立法會昔日手握十票時，每月都同煲呔曾見面一次溝通，不過，人情冷暖，自從上年十月自由黨元氣大傷之後，煲呔曾就再無咁好客，而自由黨同港府嘅關係亦變得愈嚟愈疏離。弱勢嘅煲呔曾尋日突然約咗自由黨三名正、副主席上禮賓府歎下午茶，唔通想補鑊？不過，一隻手掌係拍唔響嘅，究竟係咪修補到都成疑問，大家就要拭目以待。
主動邀約 傾咗一粒鐘
尋日嘅下午茶，自由黨只有三名正、副主席，劉健儀（Miriam）、張宇人（Tommy）同方剛，港府方面更加只得煲呔曾同特首辦主任譚志源，可能係貪人少易傾偈啦。我哋打電話畀Miriam，證實今次係煲呔曾做主動，雙方傾咗一粒鐘，席間煲呔曾叫自由黨以後對港府施政有意見，可以早啲出聲，唔使一嚟就頂到行。
煲呔曾突然邀約下午茶，係咪想同自由黨「和好」呢？Miriam話，唔估人哋係點諗嘞，至於經過尋日之後，自由黨同煲呔曾係咪回復昔日每月一聚嘅慣例，Miriam話，煲呔曾無講到。