CY今晚現身周梁淑怡主持嘅電視節目。談到一時被指係共產黨員、一時畀人話「幹部治港」。CY再三解釋，如果有中央官員同佢講要幹部治港，佢會第一個反對，加上懷疑佢係黨員已非首次，今次仲要拉埋選特首嚟講，但特首唔可以有政黨身份嘛，搞到好似質疑佢嘅誠信，隱藏身份又諗住參選咁！

「利益立場一定喺香港」

外人擔心CY作為全國政協常委會聽晒阿爺話。佢就表明「利益立場一定喺香港」，又爆料喺北京開政協會議，內裏其實好多嘢中央唔啱聽，只係佢無掛街板話成功爭取啫。之後大讚美國總統奧巴馬有勇氣、係政治家，因為佢明知山有虎、偏向虎山行，只要係長遠利益就做。至於八萬五一役，佢借覺光法師一句「為大眾做事，總會有人說你，不要害怕，行的是正道便好」，又補充當年係參考港英政府份長遠房屋策略報告嚟做，報告仲有港督同房屋司黃星華張相㗎！

最後對於組班有無信心？CY嘅答案係香港有心、志同道合嘅人唔少，但要大家努力，一齊去三顧草廬請佢哋出嚟。連組班部署都諗埋，大家仲明唔明？