「好打得」嘅發展局局長林鄭月娥呢排忙於文物保育，尋日佢出席世界水監測日活動時，不忘大讚發展局旗下九大部門經她統領下同樣「好掂」，將文物保育嘅理念推廣到全港，所以遲啲佢會去信其他政府部門，希望他們可以效法自己旗下嘅部門，將文物保育融入日常工作喎，換言之，即係叫其他部門好好向發展局旗下嘅部門學習。
林鄭呢句「其他部門」當然包括康樂及文化事務署，同場嘅康文署助理署長吳志華，正正就係當年唔見咗廿二項孫中山文物嘅當事人，上次本報追問佢時，佢就落荒而逃，尋日被困水塘避無可避，終於開腔回應事件。
吳志華話，事件已經係「好多年前嘅嘢」，部門非常重視，隨後幾年已經吸取經驗，做咗好多改善，但問到當年係佢負責去美國點收文物，下個月立法會討論事件嘅時候會唔會親自解畫，佢就即刻有所保留，話呢件唔係佢個人嘅事，未知會唔會出席喎。
對於林鄭嘅「溫馨提示」，吳志華就反應好大，話「康文署不嬲都好乖嘅」，康文署轄下嘅古物古蹟辦事處，每次當其他部門有保育問題，都會好樂意畀意見喎。