身兼智經研究中心主席嘅肥胡尋日中午現身金鐘辦事處，為傳媒搞咗個「智經學堂」，搵嚟智經研究總監李彭廣主講管治體制，肥胡臨上廣州公幹前走嚟同班記者打招呼。有記者隨口問佢食咗午飯未，肥胡摸摸肚腩笑騎騎話：「如果唔係有應酬，我中午好少食嘢！」莫非肥胡學人節食減肥？

非也！原來係早餐食得太飽喎。肥胡自爆遵照醫生吩咐，每朝起身例必食生麥皮做早餐，係人都知生麥皮口感好「鞋」，入口認真麻麻哋，肥胡發揮美食天分，倒兩杯低脂牛奶浸淋啲麥皮，再加兩羹由工人炮製嘅無糖燕窩，即時令碟麥皮生色不少。用燕窩做早餐，真係識食噃。肥胡就扁嘴話，咪睇佢食得好滋味，查實碗麥皮無加糖，味道相當寡，佢惟有安慰自己咁話：「我唔當係食麥皮㗎，當自己食緊藥囉。」鬼叫生麥皮可以清腸胃，味道再差都要忍忍喇！