主力提高能見度

副局政助登場一年，成績表可以用慘不忍睹嚟形容，副局屢爆醜聞，固然令人側目；政助隱形返工，出糧付鈔嘅納稅人，感覺如倒錢落鹹水海，更加叫人無奈。政助月薪十萬至十六萬元，工作係服務市民，但係港大民調顯示，八成六受訪者叫唔出任何副局個名，九成五人唔知政助係乜水，今時今日咁嘅服務態度，點叫市民收貨？所以，做咗特首辦主任一個月嘅Raymond譚，想翹埋雙手唔做嘢都唔得，據聞嚟緊將會發起一場提高「能見度」運動，主力催谷政助曝光率。

根據構思，九名政助以後要做政治Ball場交際花，對工作圈子裏面嘅各色人等，一律要聯絡感情，建立關係，立法會議員、區議員同社團中人唔在講，以後就連議員助理、相關記者都要周旋混熟。簡單嚟講，即係要被人「見到」你，同埋感覺到你嘅存在，而且仲要對內對外都係感覺良好嗰隻。此外，又會為副局同政助建立「行孖必」制度，副局出席公眾場合，政助如果可以，盡量一齊現身，爭取曝光，互相配合，打頭炮嘅就係施政報告地區諮詢論壇。

Raymond譚出身於政務系統，亦做過副局長，熟悉政治操作，據聞，佢希望九名政助可以透過提高能見度，改善形象之餘，亦可以為政府發揮收風、放風同拉票嘅作用，令呢支政治任命團隊有番啲隊形。其實，十六名（譚志源轉任特首辦主任後，政制事務局副局長一職暫不填補）一直都係隊形散修修，形如散兵游勇，政府依家先至話執隊形，其實都遲咗啦。

明年中檢討薪酬

副局政助受聘時，合約寫明喺四年任期中段需要進行薪酬檢討，即係明年中，局長會為轄下嘅副局同政助打分，根據佢哋嘅工作表現，好似拉票工作、與各界關係、政策執行能力同推銷能力等，評定係咪需要加薪、凍薪或減薪，再由煲呔曾、林D9「林瑞麟」同Raymond譚主導嘅委員會定奪。如果呢班政治新丁表現再無改善，到時減人工只好怨自己，唔好怪人！