立法會就快暑假休會，議員開始計劃外遊叉電，好多人都知，「象哥」黃定光喺中山三鄉雅居樂有間洋房，不過，今年暑假佢決定去遠啲，一家大細上新疆，話想幫亡父還心願。嘩，呢個旅程嘅主題咁沉重，心理壓力咪仲大過返立法會開會？
象哥本身係生意人，平日總係以西裝示人，前兩日佢走年輕路線，以牛仔恤衫示人，仲捲起手袖，見到佢呢身打扮，就知暑假快到。象哥話，呢個暑假會同屋企人去新疆行一轉，事關父親生前喺當地捐錢起咗幾間學校，為貧困少數民族孩童提供讀書機會，今次佢帶家人上去，除咗散心叉電之外，亦想順便了解吓呢幾間學校嘅最新情況，睇吓有乜可以仲做得盡善盡美啲，圓亡父心願。
早前勞工界李鳳英喺立法會大樓碌落樓梯跌至盆骨爆裂，醫藥費加埋高達十七萬元，揭露立法會議員冇資格買勞工保險問題，象哥於是自告奮勇，去信行管會要求討論，行政署因而醒覺諗計堵塞漏洞。象哥成日做好事，相信佢嘅兩名仔女，會好似佢孝順父母咁孝順佢。