電話促銷無孔不入，唔少人覺得不勝其煩；不過，廠商會代表林大輝近日寄出嘅最新議員通訊，就隨書附送已故一代禪宗大師聖嚴法師嘅「心六倫」語錄一份，等大家聽佛偈。世道不靖，勸人修行，等大家多作反省，總是一件好事情。
大輝係聖嚴法師嘅弟子，有份幫手出版聖嚴法師語錄，佢自認唔係虔誠佛教徒，但讀聖嚴法師嘅語錄獲益良多，每次遇到唔開心，就攞出嚟重溫，自我慰解一番。今次大輝通訊送聖嚴法師語錄，相信係既為神功，亦為弟子，藉此悼念今年二月初去世嘅師傅，亦都可以教化世道！
聖嚴法師嘅「心六倫」語錄，教人處理家庭、生活、校園、職場、族群、以及人與大自然嘅倫理關係，喺大輝議員通訊入面，有篇訪問廠商會永遠名譽會長陳永棋嘅文章，標題叫「識己識人識進退」，棋哥喺入面勸喻大家要給予機會年輕人，懂得退位讓賢。大輝用嚟點題嘅嗰句話，正是「心六倫」聖嚴法師嘅真言，唔知佢係想講畀邊個聽呢？