義務工作發展局及香港撒瑪利亞防止自殺會等合辦「感動全城，開拓義工世界計劃」，呼籲港人趁暑假多做義工，成個計劃約三十萬元嘅支出，由香港富豪二代組成嘅百仁基金包辦。義工計劃尋日舉行首個服務日，原本請到百仁基金主席、恒地主席李兆基大公子李家傑擔任主禮嘉賓，不過佢臨時失場，最後由百仁基金副主席施榮忻頂上。
施榮忻話，呢個計劃係由歌星譚詠麟同李家傑有一晚傾傾吓電話諗出嚟嘅，所以尋日嘅活動李家傑都好想出席，不過佢因為感冒入咗醫院，最終嚟唔到。吓？莫非李公子中招染上豬流感（Ｈ１Ｎ１甲型流感）？施榮忻就話李家傑其實冇乜大礙，只係有少少唔舒服啫。
呢個計劃首批義工尋日去咗香港盲人輔導會朝陽中心暨宿舍，探訪院內患有視障嘅弱能人士，一眾嘉賓仲同院友打成一片，齊齊jam歌兼大玩扭氣球，施榮忻仲一學就曉，即場扭咗隻可以化身白紋伊蚊嘅蜜蜂出嚟。義務工作發展局主席李澤培就話，計劃旨在鼓勵一家大細趁暑假多做義工，助人之餘可以促進親子關係。