下星期三係立法會今年會期最後一次大會，踩油連開兩日走唔甩，議程有政府發債嘅兩項決議案，又有容許僱員自行選擇強積金戶口嘅法例草案等，不過，政府似乎話之你，建制派議員至今未收過護航要求，反而港府喺暑假休會前嘅最後一次吹雞事件，極有可能發生喺今日嘅財委會，發號施令嘅部門正係娥姐揸旗嘅發展局。

娥姐咁緊張，全因係泛民早前威脅，要當局安排考察完四川，先至支持第三期重建撥款；雖然其後泛民態度軟化，聲稱只要當局答應喺撥款後提交審計同工程專業報告，就會對撥款開綠燈，但娥姐仍然唔放心，怕泛民臨場玩嘢跣一鑊。

發展機遇辦前車可鑑

娥姐咁小心，唔係無原因，早前發展局建議開設發展機遇辦事處，上財委會申請七百幾萬元，開立一個為期三年嘅首長級乙級政務官職位，據聞之前有民主黨議員應承娥姐開綠燈，點知係空頭支票，到投票嗰陣民主黨同公民黨合力反對撥款，幸而當日建制派夠人頭，撥款先至不致甩轆收場。一朝被蛇咬，娥姐今日點可以唔買重保險呀？

聽聞當局連與泛民嘅對弈策略都諗埋，按今日議程，四川撥款放喺議程嘅第三項，之前審議惹火嘅港島西支線工程撥款，議員至少拗番一粒鐘，當局依家最驚泛民玩拉布，搞到夜晚六、七點先至表決四川撥款，到時一班做生意或者應酬多嘅議員，好似中總代表黃宜弘、「小霍」霍震霆同「金勞詹」詹培忠等，分分鐘齊齊提早離場，咁就好容易出事，所以娥姐已經向友好政黨拜碼頭，提醒記緊出席今日財委會，四川撥款未通過，去廁所都要快啲返埋位。

有建制派議員私下話，香港同內地始終血濃於水，照計泛民唔敢玩咁大，蓄意否決四川撥款；娥姐緊張到要吹雞，有過慮之嫌。不過，亦反映娥姐一向打得嘅妙訣，就係小心駛得萬年船！