有一件事更加耐人尋味，每次冧樹之後，康文署嘅講法永遠係，我哋事前驗過㗎喇，不過當時冇發覺有任何問題。你話係咪非常之咁詭異呢？驗過一律冇問題，大樹忽然仆落街，唔通有妖魔鬼怪作祟？定係有外星飛碟要降落，所以用雷射激光武器事先將樹木夷平？
對於呢一個比外國麥田怪圈更離奇嘅現象，功夫茶終於得到一個科學化解釋。有康文署嘅樹隊職員爆料，其實係署方刻意隱瞞真相。就以幾日前何文田巴富街深夜倒塌毀的士、傷司機嘅鳳凰木為例，樹隊職員早於○七年已經發覺有白蟻蛀蝕，不過，有人冇如實匯報。明明有白蟻，點解要隱瞞？怕麻煩囉，只要你一話有白蟻，樹隊阿頭就要做決定，到底有冇危險呢？杜唔杜蟲好呢？斬唔斬樹好呢？如果決定斬樹，好可能會有人鬧佢唔環保喎。
於是乎，有人就喺報告上面寫咗一句模棱兩可嘅「發現蟻蹤」。你知啦，蟻之嘛，可以係黑蟻、黃蟻或者紅火蟻，唔一定係白蟻，咁就冇眼屎乾淨盲嘞。
除咗白蟻蛀蝕之外，嗰一棵鳳凰木原來仲受到人為破壞。
大約一年前，巴富街一帶有掘路工程，工人唔小心鋤傷部分樹根。哈，整鬼佢吖，又係有人冇如實匯報喎，扮到冇事發生，後來更加好荒謬咁喺樹根上面鋪混凝土，搞到棵樹傷上加傷。
即係咁，正值開花季節紅彤彤鬼火咁靚嘅鳳凰木，本來係唔使死嘅，如果有人肯悉心料理，樹唔會冧，車唔會毀，人唔會傷。就係因為康文署謊話連篇，終於砰嘭一聲，樹倒魂魄散，嚇到遇事的士司機靈魂出竅咁滯。
講到呢度，功夫茶要以金田一嘅偵探口脗宣布：謎團，已經全部解開嘞！康文署之所以一次又一次話驗過冇問題，然後冧樹冧到遍地開花，真正原因係政府官僚弄虛作假！
好似旺角嘉道理道嗰一棵砸爛途經汽車嘅木麻黃咁吖，康文署又係話之前驗過冇問題。至於赤柱嗰一棵殺死港大女生嘅刺桐咯喎，咪又係一樣囉，出事前驗過係冇問題嘅，情況仲係「可以接受」添。
計功夫茶話齋，好心康文署咪講咁多大話啦，甩大牙仲係其次，最多搵牙醫補一補啫，害死人先至恐怖吖嘛。
話時話，唐唐身為管樹大隊長，有冇受到下屬瞞騙呢？假如康文署連上司都呃，咁就大劑咯，一來唐唐非常瘀皮，二來管樹肯定失敗。
咦，將軍澳又冧一棵大樹砸毀的士險殺四人？唐唐呀唐唐，管樹其實即係管人，你好好管教康文署班大話精先啦！