金融海嘯影響名駒身價，仁愛堂前主席史立德（Allen）身為五匹馬嘅主人，當然識得睇準時機「掃平馬」啦。香港一千一百匹競賽馬中只有百分之七係未經閹割嘅雄馬，Allen早前就以二百幾萬嘅超筍價，喺歐洲買入一隻「完整」嘅雄馬，仲將佢命名為「好先生」。
Allen話太太覺得女人都想搵個好老公，而佢亦認為難得隻馬係馬圈中少見嘅「真漢子」，所以就改「好先生」呢個一語雙關嘅名。Allen之前未買過歐洲馬，加上睇相時見「好先生」馬仔細細，擔心隻馬唔跑得，不過練馬師何良就力撐隻馬買得過，結果「好先生」不負所望，三月第一次出賽就攞亞軍，之後表現一直大勇，總獎金已經累積到四百三十五萬六千元，Allen話扣除買馬、養馬同畀練馬師嘅打賞後都仲有賺。
星期日馬會舉行花旗集團冠軍暨遮打盃賽，屬於二千四百米長途賽，「好先生」屆時會挑戰賭王何鴻燊嘅「爆冷」、今年香港打吡大賽冠軍「閒話一句」，同上屆冠軍「包裝大師」等。Allen話「好先生」擅跑長途，所以對佢好有信心，不過到時鹿死誰手，就要落場跑過先至知喇。