前商務及經濟發展局局長馬時亨舊年七月因健康問題提前離開政府，唔經唔覺，佢仲有個幾月就完結一年嘅冷河期，可以重投職場。肥亨最近向我哋透露自己嚟緊會有新搞作，不過做啲乜，加入邊個機構，佢話要先賣個關子喎。
肥亨復出，我哋都有唔少冇利益衝突嘅筍工可以介紹，好似金管局總裁一職，雖然大家都傳會由特首辦主任陳德霖接任，但係外界批評政府用人唯親嘅聲音愈嚟愈大，鬍鬚曾最後怯於民意換人都講唔定，肥亨話晒都係前財金高官，依家仲做埋港大經濟金融學院榮譽教授，夠晒資格啦。
西九管理局早前宣布會就行政總裁一職進行全球招聘，仲講到明薪酬條件好到具國際水平嘅人士都會爭住做，肥亨如果擔心做金管局壓力大，不妨諗吓搞文娛康樂，加盟西九。如果要發揮佢喺政治方面嘅長處，可以考慮幫行政會議召集人ＣＹ梁振英呢個疑似特首候選人助選，早兩個星期喺一個籌款晚會上，ＣＹ都話肥亨休養咁耐，都係時候復出嘞。
身為基督徒嘅肥亨其實最啱就係做主嘅僕人，佢太太王培琪本身係教會組織「全城更新」嘅主席，馬太搞親活動多數都同老公拍住上，肥亨全職侍奉主，就一定係最冇壓力嘅選擇喇。