港協暨奧委會會長霍震霆一向醉心搞體育，將體育基因遺傳畀三位公子外，更精心特訓囝囝上位做體育界接班人，霍震霆教仔唔興揸住雞毛掃，而係身教以自己做榜樣，早兩日佢出席美國商會午餐會主講香港嘅體育發展，拉埋大仔啟剛同二仔啟山出嚟見吓世叔伯，兩位公子耳濡目染，口講話未有準備接棒，其實個心不知幾Ready。
霍氏三人組結伴出席政商界活動，已經唔係新聞。咪以為兩位霍公子只係做「保鏢」跟出跟入，查實霍震霆用心良苦。佢話，啟剛係奧委會副秘書長兼天津市政協，下屆東亞運動會喺天津搞，學定嘢係遲早嘅事；至於啟山就係小型足球會會長，多啲接觸體育界中人絕對有需要。
啟山深得爸爸真傳，講嘢口脗似足老竇，佢話東亞運動會舉行在即，表面睇嚟好簡單，背後仲有好多嘢搞，佢擅長搞推廣宣傳，不時靜雞雞喺背後幫爸爸分擔辛勞。
霍震霆之後又會飛去美國紐約開會，佢話豬流感肆虐美加，上機一定口罩不離身，仲要
吓隔籬左右有冇發燒患者或者沒精打采嘅乘客，一見唔對路，就寧願調位喎。